Taleex(Ramaas) Dec. 30, 2011- Shirka beelaha Dhulbahante ugu socda degmada Taleex ee gobolka Sool ee Khaatumo 2, ayaa galay marxalad xasaasiya. Ka dib markii ergooyinka la soo hordhigay sida la sheegay qodobo lagaga arrinsanayo mustabalka beeshaas.
Ajandaha shirka ayaa lagu soo daray habeenkii xalay qodobo door ah, oo ergooyinka beelaha lagaga codsaday in ay gabagabada shirka si rasmi ah loogu dhawaaqo maamul goboleed la yidhaahdo Darwiish State oo ay dabada ka riixayaan koox qurbajoog ah oo intooda badan oo Taleex soo gaadheen labadii maalmood ee ugu dambeeyay.
Dooda kulul ka dhalatay qodobada cusub, ayaa sababtay in la tixgeliyo fikrada ka timid dhanka dibed wareega oo wakhtigan leh gacanta sare ee hogaanka shirka Khaatumo,iyada oo odayada beelaha talada lagaga maroorsaday, inkastoo madax-dhaqameedyada qaarkood ay soo jeediyeen in aan lagu deg-degin tallaabadaas, maadaama oo dhulka beesha Dhulbahante ay ka taliyaan Somaliland, maamul goboleedka Puntland iyo kooxda falaagada ah ee SSC.
Kooxaha ka soo horjeeda gooni isu taaga Somaliland ee wadamada Galbeedka ka wada dacaayadaha ka dhanka qadiyada Somaliland, ayaa soo jeediyay in xuduuda maamulka Darwiish State laga dhigo degmada Oog ilaa Tukaraq,iyada oo caasimadana loo qoondeeyay Magaalada Laascaanood, balse xilligan oo aanay suurtagal ahayn laga dhigo Magaalada Buhoodle oo gacanta ugu jirta kooxda hubaysan ee SSC.
Qof ku sugan meel u dhaw goobta shirku ka socdo oo codsaday in aan magaciisa la sheegin sabab la xidhiidha amnigiisa, ayaa u sheegay shabakeda wararka ee Ramaasnews in ay suurtagal tahay in maamul cusub lagu dhawaaqo.
“ Waxa meesha ka socdaa waa in maamul lagu dhawaaqo oo wax jira kooxo dano gaar ah leh oo xagan dibeda ka yimid, waxa ay meesha shirka yimaadeen Doraad iyo shalay, xalay odayaasha ayay marsiiyeen in maamulka la iclaamiyo marka shirku dhammaado” ayuu yidhi qofkaas.
Haddii shirkan ay ergada fadhida isku raacdo in maamul goboleed cusub lagu dhawaaqo , waxa ay dhaawac siyaasadeed iyo mid deganaansho u gaysan doontaa Somaliland oo xuduudaheedu ku sargo’an yihiin soohdimhii gumaystihii Ingiriiska,iyada oo beesha caalamka loo muujin karo dhulka Somaliland ay ka jiraan maamulo aan wada aaminsanayn jiritaanka Jamhuuriyada oo lagu dhawaaqay sannadkii 1991-kii, laakiin aan ilaa hadda helin aqoonsi caalamiya.
Ramaasnews Desk
Hargeisa
