Libreville(Ramaas) Feb.13, 2012 - Xulka dalka Zambia aya ku guulaystay koobka Qaarada Qaramad Africa kadib markay ciyaar aad u adag kula yeesheen xulka dalka Ivory Coast ciyaarti finalka ahayd ee ka dhacday caasimada dalka Gabon ee Libreviile.
Waa markii u horeysay ee ay ku guulaystay koobkan, sidoo kale waxa xusid mudan waa 19 sano guuradii ka soo wareegtay markii ay xulka Zambia ay diyaaradi kula qaraxday sanadii 1993 caasimada Gabon ee Libreville.
Koobkan oo ay si wada jir ah ku marti galiyeen labada dale ee Gabon iyo Equatorial Guinea, waxa xusid mudan in sanadkan aanay ka soo qayb galin xulka dalka Masar oo ku guulaystay saddexdii mar ee ka horeeyey koobkan iyagoo ku hadhay wareegi isreeb reebka aha.
Ciyaartan oo aad u kululayd aya waxay xulka Zambia la soo galeen dar dar iyagoo bilawgi ciyartaba marar dhawr ah sigay goolka Ivory Coast. Waxaanay ku soo gebo geboday qaybtii hore ee ciyaartu barbar dhac goolal la’aan ah. Balse markii la isku soo laabtay ciyaarta qaybtii danbe ayay xulka Ivory coast bilaaben weeraro isdaba joog oo khal khal galiyey xulka Zambia. Sidoo kale waxa daqiiqadii 70 aad lumiyey rigoore kabtanka Ivory Coast Didier drogba kana dhigay ciyaarta inay 90 mirir ku dhamaato bar bardhac. Waxa sida caadada ah lagu daray 30 mirir oo dheeraad ah kaas oo la filayey inay goolal ku dhalan karaan go’aamiya xulka ku guulaystay koobkan.
90 mirir ee ciyaarta + 30 mirir ee dheeraadka ah kadib goolal la’aan waxa loo dhigay rigoorayaal, waxa gabagabadii guushu ku raacday xulka dalka Zambia oo xaqiijiyey inay ku guulaystaan markii u horeysay taariikhda koobka qaarada Qaramada Africa. Waxa meesha ku sugna dad badan oo magac ku leh kubada cagta aduunka sida Pele, sido kale waxa meesha ku sugna mid ka mid ah ciyaartooyadii ka badbaaday qaraxii diyaaradi sababtay inay dhintaan dhamaan laacibiinta xulka Zambia sanadii 1993.
RamaasSport
Hargeisa
