Hargeysa (Ramaas) Feb 22,2012 – Xubnaha saxaafada Somaliland ee ka hawl-gala hay’adaha warbaahineed ee madaxa-banaan ayaa si kulul u cambaareeyay xadhiga Wariye Maxamed Cabdo Xasan (Boosh) oo ka tirsa shabakada wararka ee Ramaas iyo Xasan Cumar Xasan oo ka tirsan Wargeyska Ogaal.
Xubnahan saxaafada Somaliland oo maanta shir-jaraa’id ku qabtay Magaaladda Hargeysa ayaa sheegay in xadhiga labadan wariye oo maalintii labaad ku xidhan xabsiga dhexe ee Hargeysa loo maray sifo khaldan oo ka hor-imanaysa shuruucda dalka u taala.
Wariayayaashani waxay tibaaxeen in wasiirka wasaaradda arimaha gudaha Maxamed Nuur Carraale (Duur) uu xadhiga labada saxafi u maray jid khiyaamo ah, iyagga oo sheegay inuu labada saxafi xafiiskiisa ugu yeedhay isaga oo iska dhigaya inuu wax ka waydiinayo baahinta wararka baahintooda loo cuskaday xadhigooda, balse markii ay u tageen uu amray in la xidho.
Xubnahan saxafiyiinta ah oo ay ka mid ahaayeen Xamse Cali Bulbul oo ka hawl-galla telefiishanka HCTV, Cali-Mahdi Cismaan Axmed oo ka tirsan Gabiley.net, Siciid Khadar Cabdilaahi oo isna ka mid ah masuuliyiinta telefiishanka SLSC, Cigaal Cismaan Almis oo ka mid ah telefiishanka SLSC, Saleebaan Cabdi Cali (Kalshaale) oo ka mid ah hawl-wadeenada wargeyska Waaheen, Cabdirixiin Cabdilaahi (Bidaar) oo ka mid ah shabakada Togaherer.com, Saleebaan Ibraahim Xaashi oo ka mid ah masuuliyiinta wargeyska Saxansaxo, Barkhad Cumar iyo saxafiyiin kale, ayaa dhammaantood xukuumadda ka dalbaday in si deg-deg ah xoriyadoodii loogu soo celiyo labada wariye.
Kooxda war-fidiyeenada ahi waxay tilmaameen in baahinta wararku tahay waxa ay warbaahintu qaranka u xil-saaran tahay isla-markaana ay waajib ku tahay inay bulshada u sheegaan waxa wadanka ka dhacaya, loona baahan yahay inaan warbaahinta dagaal lagu qaadin.
Dhanka kale, talaabada wasiirka arimaha guduhu ku xidhay labadan saxafi ayaa ayaa kooxdan saxafiyiinta ahi ku tilmaameen mid ay ka xun yihiin iyagga oo ka dalbaday in si deg-deg ah oo aan shuruudi ku xidhnayn ooda looga qaado oo xoriyadoodii loo soo celiyo.
Ramaasnews Desk
Hargeisa
