Hargeysa (Ramaas)- Feb . 4, 2012- Xildhibaan Axmed xasan Waysa-cade oo ka tirsan xildhibaanada aqalka Wakiilada Somaliland ee maanta ka qaybgalay kulankii Madaxweyne Siilaanyo qado-sharafta ugu sameeyay mudanayaasha labada gole, ayaa noqday xildhibaanka kaliya ee ka soo horjeestay qorshaha uu Madaxweynuhu ku doonayo in uu ka qaybgalkiisa shirka Magaalada London kaga dhaadhiciyo baarlamaanka .
Diidmada qeexan ee xildhibaanka ayaan ka farxin Madaxweyne Siilaanyo oo aaminsanaa in kulanka qado-sharaftu uu yahay mid ay dhamaanba mudanayaashu taageero ugu muujin doonaan hindisihiisa shirka, isaga oo doonaya in natiijo kasta ee ka baxda kulanka London in ay noqoto wax cawaaqibkoodu loo sinaa, laakiin hadalka Waysa-cade ayaa shaki ku abuuray mudanayaal badan.
Xildhibaan Waysa-cade markii uu dhamaaday shirkii labada dhinac, waxa uu saxaafada kula hadlay irida hore ee hoolkii qadada lagu sameeyay , ayaa sheegay in aanu si weyn uga soo horjeedo shirka Magaalada London loogu qabanayo kooxaha Soomaalida 23-ka bishan Febuary , kaasoo lgu wiiqayo Qaranimada Somaliland.
“ Ma ogoli shirkaas, waxa loo qabanayaa nimanka Soomaaliya isku haysta, ee budhcadbaa lagaga hadlayaa ma jirto, Somalilandna wax dan ah oo ugu jiraa ma jirto, waa la inagu baabiinayaa shirkaas sidaas ayaan qabaa” ayuu xildhibaan Axmed Waysa-cade.
Maalinta beri, ayaa la filayaa in xildhibaanada labada gole ay buriyaan sharciga Somaliland ka mamnuucaya ka qaybgalka shirarka kooxaha Soomaalida , waxaana ay cod ku meel marin doonaa sharci xukuumada u fasaxaya in ay ka qaybgasho shir kasta Soomaalida loo qabanayo.
Ramaasnews Desk
Hargeisa
