Hargeiysa (Ramaas) Jan. 27, 2112- Alle ha u naxariiste waxa maanta Magaalada Hargeysa lagu aasay maydka wasiirkii hore ee Xanaanada Xoolaha Somaliland Dr Idiris Ibraahim Cabdi oo habeenkii xalay geeriyooday.
Marxuumka ayaa la sheegay in uu dhiig madaxa kaga furmay xalay, saacado kadibna la gaadhsiiyay cisbitaalka Edna ee Magaalada Hargeysa, halkaas uu oo ku geeriyooday 2:00 habeenimo ee saacada Afrikada Bari, waxaana aaskiisa maanta ka qaybgalay masuuliyiinta xukuumada ah, axsaabta Qaranka xildhibaanada labada gole iyo dadweyne kale oo tiro badan.
Mid ka mida ehelada Marxuum Dr Idris, Khadar Maxamuud Gahayr, ayaa u sheegay shabakeda wararka ee Ramaasnews, in xanuunka sababay geerida Marxuumku uu ahaa ku soo boodo kaga dhuftay madaxa, isaga oo ka qaybgalayay shir ay lahaayeen xubnaha xisbiga UDUB ee uu hogaamiyo Axmed Yuusuf Yaasiin.
Alle ha u naxariiste Marxuum Idiris Ibraahim Cabdi waxa uu ahaa wasiirka xanaanada xoolaha Somaliland sannadkii 2006-dii ilaa 2010-kii xukuumadii xisbiga UDUB, waxaana uu ahaa nin aqoon sare u leh caafimaadka xoolaha, isaga oo ifka kaga tagay carruur iyo xaas.
Ramaasnews Desk
Hargeisa.
