Hargeysa (Ramaas) August 16, 2011 – Madaxwaynaha Somaliland Md Axmed Maxamed Maxamuud (Siilaanyo) ayaa la sheegay inuu ka hor intii aanu u dhoofin dalka dibadiisa uu afhayeenka Madaxtooyadda u qoray qoraal uu xilka afhayeen-nimo kaga qaaday.
Madaxwayne Axmed Maxamed Maxamed Maxamuud (Siilaanyo) ayaa la sheegay inuu qoraalka sameeyay laba maalmood ka hor intii aanu u dhoofin dhinaca dalka Itoobiya oo uu uga sii gudbay dalka Shiinaha oo uu hadda hawlo shaqo ku joogo.
Qoraalkan Madaxwaynuhu ku eryey Afhayeenkiisa Cabdilaahi Maxamed Daahir (Cukuse) oo aan ilaa hadda la baahin ama aan dibada uga soo bixin aqalka Madaxtooyadda ayaa la xaqiijiyey in Madaxwaynaha ay ku dhalisay cadho uu ka qaaday habka uu afhayeenku ula dhaqmo saxaafadda
madaxa-banaan, taas oo Madaxwayne Axmed Siilaanyo dareensan yahay doorkii ay ku lahayd guusha xisbigiisu ka gaadhay doorashadii Madaxtooyadda ee dalka ka dhacday 26-kii June 2010-kii, taas oo uu suurto-galisay in Madaxwayne Axmed Maxamed Maxamed Maxamuud (Siilaanyo) hantiyo gursiga dalka ugu sareeya.
Sidoo kale, waxa la sheegay in Madaxwayne Axmed Siilaanyo afhayeenkiisa faray inuu u diyaar-garoobo sidii uu xilka ugu wareejin lahaa masuulka loo soo magacaabo xafiiska afhayeenka Madaxtooyadda Somaliland.
Warku waxa uu intaa ku darayaa in marka la baahiyo casilaada afhayeenka Madaxtooyadda Cabdilaahi Maxamed Daahir (Cukuse) in si rasmi ah afhayeenka Madaxtooyadda loogu magacaabi doono xog-hayihii warfaafinta xisbiga UCID ee wakhtigii ololaha doorashada Madaxtooyadda lagu jirayf.
Ramaasnews Desk
Hargeisa
