Qooqaani(Ramaas) Feb . 5, 2012-Dagaalka ayaa yimid kadib markii cutubyo ka tirsan xoogaga Al-Shabaab ay weerar ku qaadeen saldhig ay deegaanka Qooqaani ku lahaayeen ciidamada dawladda Soomaaliya iyo kuwa Kenya, waxaana la sheegay in labada dhinac uu halkaasi ku dhexmaray dagaal aad u culus.
Dagaalka oo socday mudo saacado ah ayaan ilaa imika la hubin khasaaraha rasmiga ah ee ka dhashay, hase yeeshee warar aan la xaqiijin ayaa sheegaya in dagaalkaasi ay ku dhinteen afar askari oo dhinacyadii dagaalamay ah halka tiro intaasi ka badanna la sheegay in ay ku dhaawacmeen.
Ma jiraan ilaa imika masuuliyiin ka tirsan dhinacyadii dagaalamay oo faahfaahin ka bixiyay dagaalka iyo weliba khasaaraha ka dhashay.
Dagaalka xalay ka dhacay Magaalada Qooqaani ee gobolka Jubada Hoose, ayaa kusoo beegmaya xilli dhawaan ciidamada dawladda Sheekh Shariif oo kaashanaya kuwa Kenya ay la wareegeen deegaano dhawr ah oo ka tirsan gobolka Jubada Hoose kadib markii ay isaga baxeen xoogaga Alshabaab.
Saraakiil k atirsan kooxda Alshabaab ee Jubooyinka ,ayaa sheegay in ay dajiyeen qorshe cusub oo dagaal, kaasoo ay sheegeen in ay ku naafeeyn doonaan ciidamada dowladda iyo kuwa Kenya ee ku sugan inta badan deegaanada galbeed ee gobolka Jubada Hoose.
Ramaasnews desk
Hargeisa
