Sanca (Ramaas) Jan 27,2012 – Masuuliyiinta dawlada Yemen ayaa sheegay in Budhcad-badeeda Soomalida ee ka qowlaysta biyaha badda Cas ay afduubeen saddex doonyaha Kaluumaysiga ah oo laga lahaa Yemen.
Saddexdan doonyood ayaa la afduubay 24-kii saacadood ee u dambeeyay, waxayna sheegeen in doonyahaasi ay la socdeen shaqaale 38 qof ah oo dhammaantood Yemeniyiin ah, kuwaas oo wakhtiga la afduubay hawlo kaluumaysi badda ugu jiray.
Gacanka Cadan oo u dhexeeya Soomaaliya iyo Yemen ayaa waxa ku xooggan kooxaha budhcad-badeedda ah ee afduubka u geysta maraakiibta ku safra, waxaana dhowr jeer oo hore ay afduubyo u geysteen doonyo ay wateen kalluumeysato u dhashay dalka Yemen.
Dalka Yemen ayaa waxa ku xidhan in ka badan 30-ruux oo budhcad-badeed Soomaali ah, kuwaasoo lagu qabtay howlgallo ay ciidamada badda dalka Yemen ka sameeyeen xeebaha ku dhow dalkooda.
Ciidamada badda Yemen ayaa waxay sheegeen inay ku gudo-jiraan howlgallo ay ku raadinayaan kooxihii afduubay doonyaha ay wateen kalluumeysatada dalkooda u dhashay.
Ramaasnews desk
Hargeisa
